الأربعاء، 13 أبريل 2016

الصدق فضيلة

علمو اولادكم ان الصدق فضيلة ..
ازرعو ده فيهم ومتخلوش صدقهم يبقا شئ يتعاقبو عليه ..
طبقو مثلا استراتيجية تجزئة العقاب ..
بمعنى ان لما ابنك يكذب يكون في عقاب للكذب وعقاب للخطأ ..
وان صدق يتعاقب للخطأ فقط عشان بردو ميتعودش انه لو عمل غلط وقال الصدق مش حيتعاقب ..
مثلا ان عمل خطأ وكذب احرمه من مصروفه كله وان قال الصدق اديه نص المصروف واحرمه من النص وعرفه ان اللي حرمته منه لانه اخطأ وانه لصدقه خد النص ..
ولان كل طفل غير التاني فبتغير الاستراتيجية حسب اللي بيؤثر عالطفل ..
طفل تاني ان كدب احرمه من رحلة نفسه فيها وان صدق وكان مخطئ وديه واحرمه من لعبة معينة بيحبها وعرفه انه راح عشان قال الصدق وان حرمانه من اللعبة دي نتيجة خطأه ..
لازم يعرف ان الصدق فضيلة وفي حد ذاته يستاهل مكافأة وان الكدب جريمة ويستاهل عقاب كبير ..
ونحاول نطبق ده في كل امور حياتنا ..
في الشغل بين الرئيس والمرؤوس ..
بين الزوج والزوجة خاصة .. عشان ميحسش اي منهم ان لو اخطأ وكدب يكون افضل مليون مرة ويريح دماغه من نتيجة صدقه ..
خلينا نطلع جيل افضل ونحاول في اللي باقي لينا نكون افضل ..
الكدب بيدمر امم ودول ..
يكفي تشوف الاعلام والخطابات بتاعة المسئولين وتشوف تاثير الكدب ايه ..