بكرة عدا وراح .... واديني مستني امبارح
بس لو ييجي امبارح ... من غير جراح
غريبة
وحتفضل غريبة ...
وحنفضل جواها اغراب ..
ووطن الغربة جوانا ...
اصعب احتلال ...
واغرب خريطة ...
بحرها قهر ودموع ...
ومعالمها براكين .. خارج منها الدم فاير ...
نهارها اسود من ليلها ..
والحرية فيها قصة خيالية وياويل مين يصدقها .....
غريبة
وحتفضل غريبة ...
وحنفضل جواها اغراب ..
ووطن الغربة جوانا ...
اصعب احتلال ...
واغرب خريطة ...
بحرها قهر ودموع ...
ومعالمها براكين .. خارج منها الدم فاير ...
نهارها اسود من ليلها ..
والحرية فيها قصة خيالية وياويل مين يصدقها .....
هناك 16 تعليقًا:
مممممممممممممم
أنا بجد مش لاقية رد يا محمد
لغتك كويسة جدا جدا
بس الموضوع دا بجد وجعلى قلبى .. حاساه مؤلم أوى
مش عارفة بجد بس.... ليه يا محمد كدا الدنيا حلوة :$
بنغنى و نرد على نفسنا :(
السلام عليكم
جميل ...ما شاء الله
"قالو حرية وقالو سلام....طلع كله ولا كلام"!!!!
تحياتيو شكرا علي السؤال!
اصعب شئ فى الحياه انك تنتظر مستقبل قاتم وكمان سايب وراك ماضى مؤلم وتعيش واقع صعب وبتعانى ظروف اصعب بين قوسين (مفيش حرية ) لكن الحريه الحقيقية فى انك تشعر بالامان على الاقل مع نفسك
دايما بقولك كلماتك قوية
ملاحظة بسيطة (اكتب كتير كبر موضوعك ) اسف على الازعاج
لكن مقدرتش امسك ايدى انها تعبر عن كلماتك
محمود السيد / شاطئ الاحزان
الانسان حر نفسه مش لازم يستنى حد يديله الحق ده
مخترناش هنعيش فين و لا هنقابل مين و لا هنحس بألم و لا سعادة .. هنتعب و لا هنرتاح .. كل ده احنا مخترناهوش بس اللى فى ايدنا و اللى باختيارنا فعلا احنا هنتقبل و نتاعمل مع واقعنا ازاى ؟؟
ساعات كتير بحس ان احنا اللى بنصعب الدنيا علينا و نقسيها علينا .. لما احنا شايفينها وحشة اوى و قاتمة السواد ليه مستنيين انها تورينا وش تانى ما دام احنا عايزين نشوفها كده هتفضل كده و اللى عايز يتمسك بالأمل و التفاؤل اظن انه هيشوف وجه للحياة الى حد ما افضل من ده !
احنا اللى من كتر ما بنفكر فى الصعوبات .. فى الألم و فى امبارح اتعمينا و مشوفناش ان فيه بكرة و فيه النهاردة
محمد
بكرة القمر يكمل .. بكرة الحياة اجمل :)
ده حزن؟!
بالنسبة ليكي يا سمر فانا بعتذر دلوقتي بجد عن اللي حصلك بسبب الموضوع ده
بس زي ما انتي عارفة
(هي دي الحدوتة في غنوة صغيرة)
د/سلمى
بس من حقنا ناخد حقنا صح ولا ايه
حنسيبهم يقولو وحنقول سمعا وطاعة ؟
شكرا جدا ليكي
محمود باشا
حتي الامان دلوقتي مش مضمون
ربنا يتولانا والله
بالنسبة لكلماتي
انا بعبر ولو بكلمة عن شئ حاسس بيه
ممكن املا صفحات وممكن سطرين
بس ححاول ان شاء الله
نورت مدونتك
حلم برئ
وقفت كتير عند كلامك يمكن بفكر في شخصية صاحبة الكلمات اكتر مابفكر في قوة الكلمات ؟
دورت علي مدونة او اي حاجة توصلني بس معرفتش بردو
ساعات الظروف يتكون اقوي مننا
اه بنختار نتعامل مع واقعنا ازاي
ووقت ماننفذ واقعنا يقع علينا واختيارنا نبصله بس بحسرة
وكتير بنصعبها علي نفسنا بس من كتر الياس
(احنا اللى من كتر ما بنفكر فى الصعوبات .. فى الألم و فى امبارح اتعمينا و مشوفناش ان فيه بكرة و فيه النهاردة )
بالفعل كلامك صحيح اتعمينا بعد العما حنعيش ازاي ؟
شكرا جدا جدا
اختي ايمان
ايه رايك في اللي يحس بكل ده
يقدر مايحزنش ؟
" وكتير بنصعبها علي نفسنا بس من كتر الياس "
ده استسلام اكتر منه يأس .. ( ولا تيأسوا من روح الله انه لا ييأس من روح الله إلا القوم الكافرين )
مهما كانت الظروف الواحد لازم يبقى عنده ثقة فى رحمة الله و قدرته على تغيير كل شىء بس المهم احنا عملنا ايه عشان نستاهل رحمة الله ؟؟؟ ما احنا لازم نتعب و منيأسش
(اقول حاجة بس من غير تريقة : لو بصيت على اى طفل او بلاش اى طفل .. انت و انت صغير اتولدت مش بتعرف تعمل اى حاجة لما جيت تتعلم المشى وقعت كام مرة .. مظنش صرفت نظر عن المشى :) بالعكس قمت و حاولت تانى و ممكن تكون عيطت و بعدين قمت المهم انك قمت و اتعلمت و مشيت )
افتكر هو ده اللى ناقصنا شوية اصرار على شوية ايمان باننا نقدر نعمل فرق .. احنا متخلقناش عشان نتعذب احنا اتخلقنا عشان نشوف و نتحمل و نصبر و نفكر و نغيـــر
هو احنا ليه لما كبرنا نفسنا قصر اوى كده ؟؟
احساسنا بالغربة فى وطننا و الظلم و الاحتلال كل دى حاجات مش مسلم بيها منمناش و قمنا لقيناها .. دى بسبب حاجات كتير اولها ان احنا قبلنا بيهم و عندنا احساس ان الحاجات دى مش ممكن تتغير عشان كده مبنحاولش نغيرها و لو حاولنا بنحاول غلط
"واختيارنا نبصله بس بحسرة"
ليه بحسرة ؟؟ مش آخر الدنيا و مش اول غلطة و لا هتبقى اخر غلطة.
على فكرة انا مش بقرر كلام بالعكس انا بس بفكر معاك يمكن نوصل للنقطة البيضا فى السواد ده :)
و العفو جدا جدا .. انا اللى بشكرك
والله بعد كلامك
بجد النقط البيضة كترت اوي
احنا اللي مقصرين اوي بجد
ربنا يكرمك يارب
كلامك جميل ويريح اوي
الف الف شكر وشرفتي ونورتي المدونة
ليه كدة بس يا محمد :)
ربنا يسعدك يارب :)
محمد..
على فكرة أنا آسفةز.أنا فعلا مش فاهمة
انت بتتكلم عن نفسك..والبلد
ولا ايه :(
انتم بتتكلموا عن البلد؟!
احساس الناس بغربة في بلاد غريبة.؟!
طيب ليه :)
الغربة يا اختي بنحسها في البلد والوطن بالفعل
بس الاصعب لما الانسان يكون غريب جوه نفسه
هو مزيج مشاعر من ده وده
ربنا يسهل يارب
ربنا يخليكي يا ايمان
محمد كلامك مؤثر جدا جدا
بس الصوره اللى انت حاططها صعبه قوى
اعتقد ان معظمنا تايه جواه مش عارف او مش فاهم نفسه صح
ويمكن ده يكون تأثير الدنيا علينا
ماحدش فاهم حاجه فى الدنيا كله بيضحك على كله
وكل واحد مصلحته فوق الجميع
واعتقد ان الظروف دى أثرت على تفكيرنا وفهمنا لشخصياتنا
انا واحده من الناس بقيت فعلا تايهه
مش عارفه انا صح وللا الناس هما اللى صح
أتغير وابقى زيهم ولا أخلينى زى مانا
محمد موضوعك أكتر من رائع
كلام قليل بس فى الجون أحييك عليه
حلم برىء عجبنى كلامك قوى
بس ليا تعليق عليه
احنا جينا الدنيا لقينا اغلب الناس غلط والدنيا ماشيه كده
نعمل ايه ؟؟
نقاوح ونقف قدامهم ونضيع نفسنا كأننا بنخبط دماغنا فى الحيط ؟؟
ولا نستسلم ونبقى زيهم ؟؟
الواحد جواه صراع كبير بين الاتنين وعلشان كده بنحس بالغربه
ربنا يهدينا ويقوينا
سلامتك يا نرمين من التوهة
ليه بس كدة ياعروسة
تعرفي ساعات الانسان بيبقا جواه كنز
بس بيندم عشان بيكتشفه متاخر
تعالي ندور ايه المانع
علي فكرة انا بجد مرضيتش احط صورة صعبة
نرمين
شكرا جدا جدا جدا ليكي وعلي كلامك الجميل
ربنا يوفقك يارب
(احنا جينا الدنيا لقينا اغلب الناس غلط والدنيا ماشيه كده)
عندك حق بس عشان النقطة دى بالذات انا قلت (عندنا احساس ان الحاجات دى مش ممكن تتغير عشان كده مبنحاولش نغيرها )
احنا فعلا جينا لقينا الناس غلط بس قبل ما هما يبقوا غلط كان فى ناس قبليهم صح .. معنى كده ان الحال ممكن يتغير و ده طبيعى لان دوام الحال محال
و المشكلة ان احنا حاسيين ان كل الغلط اللى بنشوفه ده بقى شىء مسلم بيه .. هى كده و هتفضل كده .. مع انها مش طول عمرها كانت كده و لا هتفضل كده :)
يمكن مش على زماننا بقى هترجع صح .. على زمن ولادك بقى ان شاء الله :) بس عالاقل احنا نبتدى بان احنا نتمسك باللى عارفين و متأكدين انه صح و انتى تفضلى زى ما انتى ما تتغيريش عشان حد حتى لو كنا واحد فى وسط مليون .. واحد صح احسن من مليون غلط
و على رأيك .. ربنا يقوينا
إرسال تعليق