صراط

 المكان  .. على صراط البشر ..

الزمان  .. كل يوم .. 

وبيقولك يابني يا بخت من بات مظلوم .. 

قالوها لاجل مايبات كل مظلوم  .. مظلوم اكتر ومينطقش .. 

ضحايا التقييم والتصنيف والعنصرية البشرية .. 

انت زي ما شافك غيرك ومش مهم انت ايه .. 

في الغلط تتشاف .. 

في الصح شفاف  .. 

مملوك ومتملكش غير الصراخ .. 

والصراخ ممنوع  .. 

بتتسأل .. 

و الإجابة ان لم تكن على الهوى  .. 

هوت مطارق الظلم تتطحن فيك ..

وكل مايل في عيونهم معدول .. 

وانت معانا ولا مع دول؟ 

حتى الاقربون  .. 

يظنون .. 

وان قلت ظنكم اثم  .. تأثم  .. 

وعلى الصراط كل يوم بتتحاكم من الحاكم والمحكوم .. 

وقالك يابني يابخت من بات  ..